جاه الغلا مني وصرنا مواليف=وقدمت له نفسٍ تزايد لهفها
وحلفت له ماعن محبته باحيف = وازهار ودي من خفوقي قطفها
ما كنت اظن اني بذوق التحاسيف=وانه بيجرح من لفته وعرفها
ادري المحبه هم وخيانه وزيف=ومع ذاك جيته والمشاعر عسفها
سلاح في ايده كما سلة السيف = يقطع به اعروقي ويمسك طرفها
الين صار العرق كله تناتيف = والدم ينزف من عروقٍ نتفها
يوصف محبتنا بحلو التواصيف = وفعله يعاكس وصفةٍ قد وصفها
وعده غدى كله تسالي وتصريف = يقول حاضر مير تخطي هدفها
كلمه احبك ما لها اي تصريف = في شرع منهو من لسانه صرفها
لو هي بقلبه كان يرقى المشاريف = يسكن مع شيهانةٍ هو ولفها
خلاص يا روحي كفاني سواليف = النفس وصلت يا حبيبي حتفها
زود جراحك لا تحسب التكاليف = ومعشوقتك في بعدها لا ترفها
هذا الزمن جاير وغدار ومخيف = لبس الخيانه زينتٍ والتحفها
الصدق صار اليوم نادر ولا شيف = الا بقايا سعد من هو رشفها
ياعين جودي بالدموع الذواريف = دمعك سبايب غلطتي واعترفها
مما لجا بي غالبتني الصواديف=وبحاول اخفي علتي لو كشفها
دنياي ما جتني بشفي على الكيف=وشمسي بهذا اليوم تعلن كسفها
يا الله خفف جور هالبعد تخفيف= ورفق بمن عاف الحياه وقرفها