[محمد بن عمار]

السلام عليكم .
في سباق ٍ محموم ٍ مع العمر نودّع
هذا العام الذي مرّ كلمح البصر .
فكل عام وانتم بخير وعافية
وكل من هو عزيز عليكم .
وختام عامنا المنصرم هذه المشاركة .

[moveo=up]قام ايعاتبني وانا ابكي من عتابه وآتألّم
............ مادرى انّه لو تعّذر كان يكفيني اعتذاره
ماهقيت ان الغلا صرحه على طول ايتهدّم
....... لين حبي اللي بنيته عشت لحظات انهياره[/moveo]

طـيـف الـحـبــيـبــة

زارني طيف الحبيبة في منامي ثم سلّم = وانتبهت وقمت اهلّي به وارحّب بالزيارة
من شديد الفرحة بترحيبتي قمت آتلعثم = يوم مد الكف وصافحني بترحيب وحرارة
وابحرت عيني بعينه يوم طالعني وسلهم = واندفع دمع ٍ على خدي شديد ٍ بإنحدارة
وقلبي الولهان في صدري من الرجفة تحطّم = ايتشهّد به اجروح ٍ اعلنت يوم احتضاره
قام ايعاتبني وانا ابكي من عتابه وآتألّم = مادرى انّه لو تعّذر كان يكفيني اعتذاره
قلت له حالي نحيله يالغلا والله يعلم = واشّر . بكفّي على جسمي أورّيه الامارة
خاف ربك ياظنيني كيف ماتاوي وترحم = شوف حالي عقبكم . والحر تكفيه الإشارة
ليه يالغالي تعذّب من يحبّك وانت تفهم = ان يوم مقابلك له مدة ٍ طال انتظاره
منك ابي نفحة غلا . تدفي عظامي لوتكرّم = ومثلها لفتة نظر . ترد للحال اعتباره
صدّ . عني بكبرياء . وماتركني آتكلّم = صرت واقف آتجرّع من سواياه المرارة
وقّف ! التفكير ولساني عن الهرجة تبلّم = وشمعة الفرحة طفت والوقت ظلّم بي نهاره
ماهقيت ان الغلا صرحه على طول ايتهدّم = لين حبي اللي بنيته عشت لحظات انهياره
قمت اكفكف دمع عيني ليوم لفراقي تولّم = وكل واحد ودّع الثاني بطوعه واختياره
وارتخت منه الغطاة اللي بها كان ايتلثّم = ولاح برق ٍ من خدوده يجهر العين انتشاره
قلت انا هذا النعيم اللي به محمد توهّم = والاّ هذي جنة ٍ . منها الجنا . طابت ثماره
وانتبهت وقمت من نومي وإلآني . آتحلّم = قلت انا يالله دخيلك فرحتي راحت خسارة

محمد بن عمار