ويلِ من جمدت يمينه عقبِ ماطول رقاده=والله انْ يندم ويبلش في لياليه الشديـده
لاوقع فاس المصايب يرتعد مثل الجـراده=خايفاً شبك المشبك يرتطم به ثم يصيـده
اهِ لو ينهض ويرمي هاللحاف مْع الوساده=ويقتفي درب المعزه لاحكوا قالوا وليـده
يرفع الهامه ويطلع في سلاليـم الريـاده=والهدف سامي ولا له بالحواسيد البليـده
من بنى صرح المهابه بعدِ ما ثبّت شِداده=واعتمد بالله وسيّر منهجه وفق العقيـده
مايهاب ولا يهزّه من تزايد فـي عتـاده=لا ولا يقدر يضره من سعى له في المكيده
من نوى له بالحرايب تنفضه حرب الاباده=تلّتحقهْ ام العواصف ما تخلي له شريـده
ومن نوى له بالصداقه كلِ أيامه سعـاده=مايضام ولايهان و لاحدٍ يقـدر عضيـده