[الطائر المهاجر]

اشوف بعض العرب ما يحترم نفسه= حتى ولو هو كبيرٍ ترقل اسنانه
لا من دخل في المواقع ظنها عفسه= ولا شاف اسم الأناثي ضيّع ارسانه
كالثور لاشاف الاحمر دفرته جفسه= ما يدري اللي يخبي خلف نيشانه
يحسبه مستور محدٍ عارف بدسه= مايدري انه على المكشوف باعفانه
يغيب عقل الفتى لا زاد به مسه = تغويه نفسه ويلعب فيه شيطانه
ولو هو تفكر وحاسب نفسه بنفسه= ان كان في القلب لو جذوه من ايمانه
ما اظن يرضى على اخته غلطة طفسه= ياكيف يرضى يقلل في الملا شانه
وان كان ميّت ضمير ولاهو يحسه = فالله يمهل ولا يهمل بحسبانه
يشوفها في اعز الناس منغرسه = في زوجته او خواته او بعيلانه
"النت" كالبحر ياللي جاهل بغطسه= فخلك حذر دام ما تدري بقيعانه
ما كل اسمٍ مؤنّث يعكس لجنسه= البعض يخفي شنب لو غير الحانه
وما كل من شفتها انثى قلت ذي سلسه= يمكن تبيني بردٍ تجهل اردانه
ولو ليّنت هرجها عن جهل في وجسه= ما حسبّت زود بعض الهرج نقصانه
ما تدري ان الحصاني حولها شرسه= والكل جاهز يبي يفرس بنيبانه
والرجل يمكن يطيح بوحدةٍ نحسه= تسحبه معها لدرب ابليس واعوانه
من ساقطاتٍ بدرب النت في غلسه= يصيدن اللي خفيف العقل خيفانه
ماهمها غير جيبه تنتظر كنسه = وتلوي ذراعه اذا حسّت بعصيانه
فالرجل ماهو بشكله او غلا لبسه = الرجل عقلٍ يحكمه دين باشجانه
دينٍ بقلبه ولا هو دين للجلسه = يخدع لنفسه ويخدع غيره لسانه
والرجل من صان نفسه ماوطى الدنسه= حتى بحرفه وما يكتب بقيفانه
ولا شاف منهي تحاول جره بخلسه= فضّح بها شان يمنع شر باوطانه
هذي مثل فارةٍ ما تنقرب نجسه = ومنهو تساهل بها خوّان لاخوانه
وحنا بقصر الفطاحل من جهل حدسه= النهج واضح ومكتوبٍ ببيبانه
درب النقاء دربنا نحرص على غرسه= عن دين عن عقل نرفع عالي اركانه
ولا نقبل اللي انحرف يبحث عن الخسه= ولو هو تلون كشفنا خافي الوانه