ياخوان والله ماحب الرثاء لأنني مهما قلت لن أوفي الغالي حقه وأحس إني مقصر كل التقصير ولكن خرجت هذه غصب بأسباب
ياموت في قلبي شعمت المشاهيب=لامابرد مشهاب ورثت مشهاب
ماحصي عدد غالي رفاقة وأصاحيب=مابين شايب والذي مابعد شاب
غيّبتهم وامر الولي حق ومصيب=وضربت قلبي بقدرهم شلف وحراب
خذيت أبوي اللي يوفي المطاليب=وله شهرة ٍ عند الرفاقة والأجناب
دايم معزب مايدوّر معازيب=ويفرح بضيفه لاسمع قرعه الباب
ولاهو يضاهي لافعل للمواجيب=يرجي جزاه من الولي رب الأرباب
وصليب رأس ٍ لاعوا الذيب للذيب=لاجا نهار ٍ يضرس الناب بالناب
مواقفه يشهد بها بعيد وقريب=وله هيبة ٍ عدابها دون الأقراب
لولا زعل غالي رفاقة وأجانيب=عدّيت فعله ويهبا كل كذاب
وذوده خيار خيار حرش العراقيب=معربات ٍ طنبها خيار الأطناب
وبعده خذيت الذيب إيوالله الذيب=ذيب ٍ خذا في ذروة المجد مرقاب
قرم ٍ بجيش الروس سوا التعاجيب=اللي قتل منهم بلاعد وحساب
ست سنوات ٍ بين حرب ٍ وتدريب=متسمي بيرموك في صف خطّاب
سهمه وراية في العدا وقع ويصيب=ومن عدّة العدوان والكثر ماهاب
وأستشهد بخطة منافق وترتيب=وعسى رجاه بجنّة الخلد ماخاب
هذاك منشط خوي رجل المواجيب=أطول به بين المعارف والأغراب
وبعده خذيت الشبل من منقع الطيب=محمد بن حسين من بين الأتراب
ساسه عريب ٍ من طوال المراقيب=ومجناه من روس الشواهيق وهضاب
موته خطف قلبي بحامي الكلاليب=وياموت من غيّبت إهو الذي غاب
وجدي عليهم وجد شالح على ذيب=أو وجد سعدون العواجي على عقاب
أو وجد من صكّت عليه المغاليب=صكّوا عليه وحيد عكفان الأشناب
فيالله ياللي تعلم السر والغيب=تجمع عليّ في جنّة الخلد الأحباب