وظلم ذوي القربى أشد مضاضة ً=على النفس من وقع الحسام المهند
*
من تداعيات الإنتخابات .. وإفرازاتها .. كانت هذه الكلمات .. حيث أفرزت لنا من هو عدونا وصديقنا
وقد كشفت عن بعض الرؤس التي وللأسف كانوا من الأقربين ..
*
لومانجحنا رقمنا يفرق السوم=واللي تحدانا عطيناه برهان
ماهمنا اللي يكثر الحيف واللوم=مانلتفت لفلان ولاّ لـْـفلنتان
عاداتنا والرزق بيدين قيوم=مانرتجي إلا رضى رب الأكوان
البارحه دارت هواجيس وهموم=ثارت بصدري مثل ثورات بركان
والقلب مما صار يا الربع مهموم= من عيلة ٍ جتنا من أقراب وإخوان
جونا بردا مخفي ورى حبة خشوم=عدوان مستترين بثياب صدقان
أقرب قرايبنا بدا يرمي سهوم=بدّوا عداوتهم وبان الردا بان
يبون طيحتنا وهم دايم الدوم=يسعون للتخريب في كل الأحيان
شلة ردا مابين خبل ٍ ومذموم=للدنفسه فيهم علامه ونيشان
وحنا بفضل منزّل الطور والروم=للطيب والنوماس والمجد عنوان
مع العرب لنا مواقيف وعلوم=ربع ٍ لنا وقفاتهم تجلي أحزان
أبدا بمن طيبه موثق ومختوم=من عزوتي ربعي هل الطيب ويلان
وشمر / ظفير / سهول / وفضول وبقوم=عتبان ومطير وخوالد وعجمان
وحرب ٍ لنا معهم بعد قسم معلوم=ماقصروا معنا طويلين الأيمان
وبني تميم مزبنة كل مضيوم=وبني عطيه والعوازم وقحطان
ولاأنسى الهواجر مع بني عبس ونعوم=وأهل الشمال اللي لهم قدر ٍ وشان
وسبيع لأظلم ليلنا صاروا نجوم=يازين فزعتهم اليا ثار دخان
أنا أشهد إني مرتكي لي على حزوم=كل القبايل والنعم دون نقصان
ناس ٍ تحامت دوننا كلها قروم=مابين مطنوخ ٍ ومابين طنيان
وأختم مدام إن الحكي صارمفهوم=بقول بيت ٍ قيل من غبر الأزمان
( ياحمود يظهر لك صديق ٍ من القوم=ويظهر من الربع الموالين عدوان )
*
مبارك نايف أبوظهير
ملاحظه :
البيت الأخير اللي إستشهدت فيه هو للشاعر الكبير :
مفضي بن ولمان الأحمدي الحربي
*