ذيبٍ عوى وأنا على صوته أجيـب=ومن ونتي جضت ضواري سباعـه
عز الله إني جاهل ٍ ما أعلم الغيـب=والغيب يعلم بـه حفيـظ الوداعـه
يالله يـا رزّاق عِكـف المخالـيـب=يا محصـي خلقـه ببحـره وقاعـه
تفرج لمن صابه جـروح ٍ معاطيـب=وقلبه من اللوعـات غـادٍ ولاعـه
إن ضاق صدري لذت فوق المصاليب=مانيب من يشمـت فعايـل ذراعـه
صار السبب مني على منقع الطيـب=ونجمي طِمَن بالقاع عقب إرتفاعـه
يا طول ما هجيتهـن مـعْ لواهيـب=ولاني برادي كسرها مـن ضلاعـه
ويا طول ما نوختها تصـرخ النيـب=وزن البيوت إللـي كبـار ٍ رباعـه
وأضوي عليهم كنهم لـي معازيـب=إليا رمـى زيـن الوسايـد قناعـه
أضوي عليهم واتخطـى الأطانيـب=وآخـذ مهاويـه الجمـل باندفاعـه
أبا أنذر إللي من ربوعي يبا الطيـب=لا ياخذ إلاّ مـن بيـوت الشجاعـه
يجي ولدهـا مـذرب كنّـه الذيـب=عِز لِبُـوه وكـل مـا قـال طاعـه
وبنت الردي ياتي ولدها كما الهيـب=غبـنٍ لبُـوه وفاشلـه بالجمـاعـه
يا كبر زوله عند بيـت المعازيـب=متحـرّي ٍ متـى يـقـدّم متاعه