العين تشكي للكرى من سهرها= وأنا وهواجيسي على غير ميعاد
مرٍّ تغطّسني بغبّة بحرها = ومرٍّ ترجّعني بلا كور وشداد
لايام حلوه ليت منهو حضرها = ويعيشها لو حلم في لحظة رقاد
يانعمة النسيان هاتي خبرها= ولا تحضرين اللي نسيته من انكاد
قولي عن اللي القلب لامن ذكرها= يفزّ مثل الطير بيدين صيّاد
وسط الحنايا لو بكيفه كسرها= واطلق جناحينه ولاهاب الابعاد
يدوّر اللي ما بدى له قمرها= يقضي ليال العمر والنفس بجهاد
ريمٍ ربت بالقلب باوّل صغرها= تسقي عروقه صافي الشهد باسعاد
من مزنةٍ بالحب يطفى مطرها= لواهبٍ من قيض الايام بابراد
من يوم راحت والفرح في اثرها= والقلب من حزنه نزف جرح وقّاد
يالله يامجري سحاب ومرها = تمطر على العربان في السهل والواد
تجمع لروحينٍ شكت من قدرها= وافرح بلقياها على غير ميعاد