كغيري من الناس ممن جرفهم تيار الاسهم
واصابهم ذلك الزلزال المخيف
ولكن هي تجربة اضعها لكم على عجالة في هذه الابيات
انا بديت براسمالي ثمانين = ووزعتهن بين المواشي وبيشه
وحطيت معهن كثرهن ياميامين= يالله نبي ناكل مع الناس عيشه
قلنا نبي نكسب وراهن ملايين = وجهزت للمكسب ثلاثين خيشه
قلنا نبي نركب جيوب وصوالين = ونبي نغير وضعنا بالمعيشه
ونبني لنا فله كبيره بدورين = ونحط مسبحها بخلف الدريشه
احلامنا فاقت حياة السلاطين = وفاقت حياة اللي على الراس ريشه
كنت احسبه يمشي بعدل وموازين = ما كنت اعرف الحرمنه والغشيشه
جيته غشيم وطحت بين متواسين = واثري دخلت بغابة (ن) مستهيشه
لقيت ناس تاكل الزين والشين = ما همها الا يومها اللي تعيشة
هامورهم يامر وهم له مطيعين = كنه اوامر قايد وسط جيشه
السوق ماهو للصغار المساكين = لعبة هوامير تبختر بريشه
واليوم ابشركم بقالي ثلاثين = وانا احمد اللي كافل (ن) هالمعيشه
وثلاثة اسهم تدمي القلب والعين = سهم المنايا والمواشي وبيشه
ابو عبدالرحمن القريشي