متاهات الغرام ورحلة العاشـق بـلا أوطـان
متاهات السنين وشمس تسحب نورها الهادي
شراعي تاه في الغربه بليـلٍ والقـدر ربّـان
يوجهني على كيفه ولا ادري وين الابعـادي
ادور في زمان الصمت من يفهم على الإنسان
يساعدني على درب العنا ما يكسـر شـدادي
يحب بصدق من قلبه ولا هو في الهوى فنّان
ولا له في دروب الغـي لا ناقـه ولا حـادي
ولقيتك يا عديل الروح نبع الحب في الحرمان
لقيت الحب في قلبك عطاني الفرح واسعادي
يا اجمل بدر في ليل اشتياق المولع الولهـان
يا نور الله في دنيـا كئيبـه لونهـا سـادي
تلاقينا ونجم الحب يوضي في سماء الوجدان
ينادي روحك وروحي ويعلن فجـر ميـلادي
حبيبي كيف جمّعنا القدر من عالـم النسيـان
وحلمٍ ضاع يتحقـق وشوفـك دون ميعـادي
صباح الخير ياورد الربيع وعطـره الفتـان
صباح الخير نسمات الصبا في البر والـوادي
اشوف إنّ السفر طوّل وقلبي مرتع الأحـزان
ولو حاولت اشغاله ينـادي ويـن ياالغـادي
اخاف إن السفر ياخذك مني لشاطئ السلوان
تجيني يوم متغيّر وتفـرح بعـض حسـادي
دخيل الله أنا مقدرعلى ُبعدك فانـا عطشـان
عروق القلب يبّاسٍ تبي من عطفك امـدادي
شاعرنا وأستاذنا الكبير ... صح لسااااااااااانك
ابيات جميله جدا وقصيده في قمةالروعه ، وبالفعل تلمست بهذه الكلمات عنان السماء ،
فطابت بها القلوب عشقا وحبا وشوقا لأعذب الألحان
تحياتي لك
أخوك / محمد بن عبدالله السلمان " الواهم "