عنيده ليه يا دنياي مدري = علي تقسين وادري بك عنيده
انا شسويت لك عانيت بدري= وكبرت ولا تزالي لي ضديده
فانا من صغري وهمي بصدري= ولا تهنيت في لحظه سعيده
ولو مرت غلط احتاط لامري= اخاف تكون خدعه او مكيده
صبرت ولا نفع بالهم صبري= قديمه صار يفزع له جديده
وصرت اليوم مثل العود مبري = ثناني الوقت تثناة الحديده
قضيت العمر في طيبٍ وطهري= ولا اقبل بالمعايب والنقيده
ورغم هذا بعد شيبي وكبري= يجيني الظلم من اقرب بديده
من اللي يفترض عضدٍ وظهري= ودرع وسيف لاوقاتٍ شديده
على مهلك ترى اتحملت وزري = بقيل وقال وهروجٍ بليده
وترى ظلم القرايب كان تدري= على الإنسان اخطر من بعيده
فلا هو محتمل مرٍ وقهري = ولا هو قادرٍ يكشف رصيده
فطف النار قبل النار تسري = تراها لاسرت فانت الوقيده
واذا للحين ما تعرف لقدري = فسل من عنده أفكارٍ سديده
حرار الطير ماتنصاد جبري= فلا تفكر بأني من تصيده