[الطائر المهاجر]

ياقصيـدي انسرقت ولا بقـى منّك بقيّه = وصرت اطارد بالنوادي مثل من ضيّع جنينه
من نشيط ليد نشيطٍ بين جهـلٍ او حميّه = وكلّمـا امسك حرامي قالـوا احذر لاتهينه
اللطش ماهوب سرقه وانت خاسر للقضيّه = اعتـذر له علّ يسمـح فاتهـامك ما يدينه
يا عرب وش لون هذا من طلب حقّه اذيّه = وين ديـن الله فيكـم ووين شـرعٍ عارفينه
كل من يلطش حرامي فالعبـاره هيّه هيّه = وسـارق الديـنار تقطع يده ..ولاّ جـاهلينه
من سرق ماهوب مؤمن .. قايله خير البريّه = ومن لطشني ما ابيحه وادعي الله ما يعينه
وادعـي ان الله يشـلّه بالـرباعي ميّه ميّه = طايحٍ بالأرض خرقه والدمع يجري بعينه
ولو لقيته في القيامه وحالته تصعب عليّه = قلت ياربي سرقني حتى اشعـاري الحزينه
يا الحرامي افتهم لي واستمع نصحي هديّه = حتى لو حطوك شاعر فالشعر عندك رطينه
تخدع لنفسك وغيرك وتتبع النفس الرديّه = وتنكشف في أي لحظه والفشيـله لك قرينه
هذا من غير العقوبه .. فالله اعلم بالخفيّه = يالحرامي تب لربّك واترك دروبٍ مشينه