[الطائر المهاجر]

بعض العرب يطغى إذا صار شاعر = ينظر لنفسه بالسما من يجاريـه
يركب جنـاح الوهم تلقاه طـاير= والناس تحته تختصم في قوافيـه
ياخذ ولا يعطي ردوده نـوادر = ويبيك تمـدح دوم لو فيه ما فيـه
وان قلت له غلطـان تلقى يكابر = يمكن يظنّك قاصـدٍ بس تؤذيـه
الشعـر كلمة جت لعكس المشاعر = من داخـل الإنسان تظهرخوافيـه
ومن لا يقـدّر حس غيره يخاطر = ومن لا عطى محدٍ على الطول يعطيه
ومهما علا نجمه ترى الدهر داير = يطيح بالـوديان والوقت يطفيـه
وينسى مثل غيره ولـو كان كابر = من غير ذكـرٍ للمحاسن بطـاريه
خلّ التواضع منهجك قوم بادر = واكسب زميلك بالجمايل وخاويـه
زود الكبر بالنـار احذر وحـاذر= ان كان بك إيمان في يـوم ترجيـه
العمـر فاني لـو تزور المقـابر= يمكن تـذكّر شي شـايفك ناسيـه
اليوم عايش ، تضمن العيش باكر =أوّل حسابك هالكبر وين تخفيـه