السلام عليكم
من جديدي مشاركة عسى أن تكون
بالمستوى المأمول لذوائقكم ..
أغـصـان الـقـريـحـة
تعالي ، هـزيّ أغصـان القريحة ، هـزّة ٍ بالهـون = خذي مـالاق مـن جـزل المعانـي وإتركـي الباقـي
تعالي أشعلي ، شمـع الأمـل ، يالطايـر، الميمـون = تعالـي إنثـري ، نفـح العبـيـر ، بعـطـرك الـراقـي
تعالي فكيّ أصفاد الأسـر، مـن كاحـل المسجـون = وروفي ، بحالـه اللي ينتظـر ، إذنـك بالإطـلاقـي
عقب صدّك وهجرك ، ما بقى للـزاد طعـم ولـون = وصارالشرب من زود الشقـاء ، ماهـوب ينذاقـي
سمان الهرج ، تطربني وأنا ، من قبلها ، محزون = ويهيضنـي جزيـل القـاف يشعـل نـار الأشـواقـي
تواقد في محيط الصدر ، لاعـج شوقـي المكنـون = على روض الحشاء نار ٍ سناهـا يحـرق إحراقـي
وفاحت دلة المعنى ، على جمـر الحشـا المدفـون = ومن عذق السنيـن أقـدع مـرار الصبـر، ترياقـي
ومسباح القصايد ، ناظمه من فكـري المشطـون = علـى الإبهـام والشاهـد ، أقلـب ، جملـة أوراقــي
تصافحنـي تصاريـف الـزمـان بكفـهـا المـدهـون = خضاب ٍ نصفه اهموم ٍ ونصفـه ضيـق وارهاقـي
أهوجس في العنـود ، اللـي تثنـى بقدهـا المـوزون = وحبل الفكر، قيّـد هاجسـي ،، وأحكـم بـه وثاقـي
ذكـرت الوردتيـن اللي عـلـى وجناتـهـا يـزهـون = وبياض اللولو اللي في الثنايا ، يشـرق إشراقـي
تهـزّع ، بالمشـي ، مـع نابيـات ٍ خلفهـا يشكـون = كما هزعت غضيض الورد في ظـل ٍّ على ساقـي
متى مالـدّت ، بطـرف ٍ حجاجـه بالشعـر مقـرون = يفزالقلب ، مـن شوقـه ، مـع النظـرات ، خفاقـي
على سـدرة غديـر الوجـد تبكـي الفاختـه بلحـون = يجاوب نوحها الخفاق بأقصـى روض الأعماقـي
أهـدّي ثايـر العبـرة ، وعيـنـي تنـثـر، المـخـزون = وبين الرمش والوجنة ، أكفكف ، نـزف الآماقـي
وأنا لولا الحياء ، وأخشى يقولون الفتـى مجنـون = وحـق اللي بنى ، مـن فـوق خلقـه سبـع ٍ طباقـي
لأجهّزعـدة الغـازي ، وأصبّـح ديـرة المضنـون = وأطفـيّ ، من لهـيـب ًٍ ، داخــل الـوجـدان حـرّاقـي
ويحلى النوم من عقب اللقاء بالصاحب المزيون = ونفتـحٍ للوصـل صفـحـة ، عـلـى عـهـد ٍ وميثـاقـي
مدام الموت سنة ، وش حدا بعض العرب يبكون = إذا جـت سكرتـه وإلتـف سـاق ٍ مـن علـى ساقـي
يطيب الوقت لك ساعة وساعات ٍ يضيـق الكـون = ومهمـا ، طـالـت الأيــام ، فيـهـا سـاعـة فـراقـي
مودتي وتقديري
محمد بن عمار