لبن منشار لك يامنتدى في خافقي منزال=ولك ذكرى وفيك افكار وقوافي نسجلها
نزلنا فيك قبل التقنيه والشات والجوال =على وضح النقى يامنتدانا مانبدلها
عرفنا رجال ماتو والرجال اللي بقو ورجال=وسولفنا مع اهل المنتدى ووجيه نجهلها
كتبنا الجرح ينزف والفرح واحوال راع المال=وسقنا الفقر بين حروف ماتخفى محللها
عرفنا الحب في دنيا الخيال وكله استقلال=وسقنا الجمر لاهل الكيد واللي طب حصلها
وسيع الجال كالبركان لامن ثار والزلزال =خفيف الروح لاهل الود وان وافيت اجملها
عرفت الشعر حد السيف والا السيل لامن سال=عظام الخصم في وقت اللقا حده يفصلها
عرفنا وجوه وابدعنا وشال البعض بالموال=وضاق البعض والعربان ماصرع من يزعلها
تعارفنا توالفنا تصادمنا وراق البال =وجينا اليوم للوتساب واصواته ننزلها
الا يامنتدى منك العتب لو ترسله سلسال=ولكن حل خنق الصوت حاجه وانت مهملها
ترى الشاعر ليا ماسمع صوته ماأبْدع المرسال=ولا فاح الخزامى والنفل والورد كللها
هذّا يامنتدى رايي على الله يبلغ الامال=وصلو عالنبي اللي بيّن اياتٍ نرتلها