اعزائي من اعضاء وزوار لهذا المنتدى والصرح الشامخ للشعر النبطي يسعدني ويشرفني أن اشارككم بهذه القصيدة وهي من نتاج حياة شاعر خمسيني عاصر الدنيا وعاصرته .
ماكل من يضحك بوجهك يودك = ولا كل من يزعلك بصدقه معاديك
واللي بصدقه عن خطاياك ردك = لو يزعلك اليوم بكره يرضيك
ولا كل من تنصاه بضيقه يسدك = حتى ولو انه صديقا مصافيك
ترى الصديق اللي إلى طحت شدك = هو الصديق اللي على الخير يهديك
ومن يمدحك بافعال خالك وجدك = ماينفعك مدحه إلى بار طاريك
من يرفعك بالمدح فوق حدك = تراه كذاب وله غاية فيك
إلى انتهت مايسألك ويش ودك = ولو قابلك بالدرب مايلتفت فيك
واحذر تبيح للمخاليق سدك = ماكل من تعطيه سدك يداريك
خله بصدرك لو على البوح حدك = والسر لنه باح للناس يوذيك