[شاكـر محمـد]

لا عاد ترجاني وانا يوم جيتك=لقيتك اللي بالمشاعر تسلاّ
تدري؟ ورب البيت فعلاً بكيتك=ومتعمّد اخلي دموعي تهلاّ
ومن كثر دمعي لو بعيني لقيتك=يكون طحت وطاح طيفك وزلاّ
لكن في قلبي مكانك وبيتك=واثرك دريت وقمت عنّي تغلاّ
يا ما ليالي بالمحبه سريتك=حتى قصيدي فيك طرقه يشلاّ
غرّك وفاي وغرّك اني عطيتك=مفتاح قلبي وقلت فيه استظلاّ
واسرفت يوم اني بصدقي سقيتك=شهد الغلا اللي من رحيقه تِعلاّ
عز الله اني وقتها ما هقيتك=ترمي في العد المصفّى بملاّ
جرّحتني حتى انني ما دعيتك=تشوف جرحك كيف فيني تجلاّ
ويوم انت كثرت الجفا قلت ليتك=تاخذ معك قلبن بجمرك تصلاّ
لكن خلّيته وانا ما رجيتك= قلبي وانا اولى به ولو هو معلاّ
حاولت ينسى غير ياكبر صيتك=حتى ان نبضاته بذكرك تملاّ
كن الدم اللي فيه لامن شكيتك=جيوش تحربني متى قلت ولىّ
وانياط قلبي ترتعش لا طريتك =وان العروق اغصان باسمك تدلاّ
وبالرغم من هذا فانا ما نخيتك=طوّعت قلبي لين طاع وتخلاّ
حتى نساك القلب وانا نسيتك=ما عاد هو باللي بوصلك يهلاّ
طويت صفحة من حياتي, طويتك=اصلا مضيّعها في اية سجلاّ
حتى ولو بالصدفه مرّة قريتك=مرّيتها مرّ السحاب المعلاّ
حبك قضيه وانتهت ما بديتك=من دون كوني اعودها الف كلاّ