كن قلبي بيت طين وكل ماوسطه خراب
انهدم حوشه على الروشن وطاحت هيبته
وانفتح بابه على طرد الهبايب والسراب
والدرايش سكّرت بعض النظر في خيبته
إنبنى في صحصح(ن) مافيه غير الاغتراب
غير رمث(ن) داخله شاف القهر من ريبته
وفيه عصفوره على المرزام تشكي للسحاب
من عطش جذع المقام اللي ضمى من شيبته
هذا قلبي مالقى في سور محرابه عتاب
انتهت حتى الأماني ما تواصل طيبته
آآآآه ياقلبي رواك الحزن ورويت العذاب
كيف تروى من عذاب الحزن قبل مصيبته
ان فتحته صار صدري من معاناتي كتاب
وإن تركته مالقيت اللي بكى في غيبته