ليتي مفهي مثل بعض الرجال = ماتحركني علومٍ او هموم
منشغل كالغير في جمع الريال= وكل يوم برحلةٍ حول النجوم
مير انا لي ضامرٍ فيه اشتعال= مدركٍ للجو من خلف الغيوم
يوم كان الغرب يفتل للحبال= والعرب بالجهل تفطر او تصوم
مادروا باللي يخطط باكتمال= لغزوهم في صمت في سر الكتوم
نعرف الحاضر ومابه من ميال=ونجهل المقبل ومابه من قدوم
والوثايق بينت شيٍ هبال= العرب تبلع من اصناف الطعوم
والغرب هو من كشف سر الرمال= والذهب من تحتها بحر يحوم
كل ما يجري علينا من وبال= من تحت راسه وهو خلف الرجوم
قال خل الناس تركض في خبال= من ورا الدينار في سهل وتخوم
ومن تبع رزه ولو فيه اعتلال= ومن نطق بالحق يختم بالختوم
الدعايه فرض في كل المجال= والمطبل شجعه يرمي الشموم
لو خذينا ريال تاخذ نص ريال= وناخذه منّك اذا جالك لزوم
تشتري منا قشور البرتقال = ومعه ديكورٍ يهيّب للخصوم
وكان تتغيّر ترى مابه جدال= غيرك اشطر راح ماعنده هدوم
راجع الأحداث تفهم بالعجال= واعتبر بالغير تفهم بالسلوم
نحرّك الشارع بخرفان وجمال= وخلفهم اشباح تدفع بالرخوم
عن حقوق انسان تبحث بالسؤال=والشعارات اللي تصحي من ينوم
ان رحلت فحل ماله من مثال= وان تقاوم فانت من يصبح ملوم
نشعل الفوضى لتأذن بالزوال= لكل ماهو نافع بارضك عموم
ولا وصل مندوبنا بعد الختال = ناخذ المكسب مشاريعٍ تقوم
نوهم الأعراب فيها بالجمال= وننفع اللي بدارنا كنزٍ يدوم
ونستمر بأرضكم مابه مجال= يوم نرحل دام فيها ما نروم