عا صفات الياس
قديمه كتبتها في مقتبل العمر
ولازال لها ذلك الاثر العميق بنفسي
منذ ذلك الحين الى الان اثر وتاثير
مافتيء يعاودني ويهز وجداني
ومعه تاتي ذكرى تلك القصيده
الديار اللي بها دمعي ذرف=واعسى صافي قمرها للخسوف
في ديار الجوف دمعي مايجف=كيف اطيق العيش في ارض ٍ جحوف
آه ياابو سعود أنا نجمي خسف=أظلمت دنياي من جور الصروف
وين أيام السعادة والترف=يوم لي دنياي تصفق بالكفوف
تبكي عيوني على عهد ٍ سلف=قبل ماتقسى على قلبي الظروف
كل شي ٍ في حياتي اختلف=آه من دهر ٍ بحالي ما يروف
ياهلي وان كان فيكم لي عطف=أنقذوني قبل صيحات الحتوف
من هموم قاتله فوق الوصف=وعاتيات اليأس في قلبي تلوف
في ديار الجوف كفي فوق كف=مثل كهل ٍ طاح ما يقوى الوقوف
في أمان الله يا أهل الشرف=عند ديار الجوف لي قلب ٍ عزوف
وادعوني لو سمحتوا في لطف=في وداع ٍ ما أعتقد يقفاه شوف
واللقاء خلوه في حكم الصدف=يكفي المشتاق أوراق الظروف
لو أعيش العمر في ظلمة كهف=وسط صمت الليل في وحشة وخوف
ولا أعيش بذل مكسور الطرف=أسقي بدمع الأسى زرع الشفوف
ياعجوز الخير ما عنك خلف=لكن الشكوى إلى رب الألوف
مالي بدنياي غيرك أي شف=كم عليك النفس مليانة حسوف
وكم تمنيت ألبسك صوغ وتحف=وآخذك للحج لو فوق الكتوف
وأبني لك فوق القمر عرش وغرف=ومن خيوط الشمس أغز لك شفوف
ما أحسب أني أنعثر بالمنتصف=وتقطع الأقدار حظي بالسيوف
لين من جور الزمن قلبي تلف=أجرع الأمرار أشكال وصنوف
صرت بعد العز في موقف ضعف = كل ما أحكي كلمة أسبقها بأووف
لو تحقق لي من الدنيا هدف=البكا والهم والضيق مخلوف
ياعجوز الخير لو حظي وقف=كان مابعت الحرير بثوب صوف
ياعجوز الخير قلبي يعترف=بالقصور بواجب الأم الرؤوف
ياعجوز الخير قلبي يرتجف=ولا أحد ٍ غيرك بأحوالي عروف
لكن الدنيا بها عدل وملف = والحظيظ الي بها مثل الخروف
ياعجوز الخير في أقصى ظرف=عجعجت في مهجتي ريح ٍ عصوف
خايف أن العقل مني ينخطف=والبشر خلفي يطقون الدفوف