فرحة الصايم على وقت الفطور=مثلها فرحه مع الرب الكريم
فرحه احلى من شذى كل العطور=ينتشي منها الرجال امع الحريم
قلت لو سجلتها فوق السطور=ترسم البسمه على روضة خريم
ون لمحها الشاعر اكمل كل دور=وارسل الحكمه ومابالقاف ضيم
سعود سعد الحافي الملقب بداعي الشوق
( صح لسانك يا بو محمد )
الشهر نغليه من بين الشهور = أنزل الله فيه قرآن كريم
فرصة المومن مع ربٍ غفور = يقتنصها اللي رجا ربٍ رحيم
يا فلاح الناس بالنعمة تبور = عاثيه بإسرافها و الله عليم
و انت ما يخفاك في بعض الأمور = تعرف اللي نقصده منته غشيم
منيع
الصيام الصح هو صوم الشعور=وتتقي الرحمن من حر الجحيم
ولاجوع البطن كله في حدور=مانفع راعية والمرتع وخيم
صن لسانك والجوارح لاتثور=ورتل القرأن وخلك مستقيم
وجعل الدنيا كما قالو عبور=كلنا فاني ولامنا مقيم
عبد الله الشويمان الملقب بالرعد
عجل الافطار واخر للسحور=قاله المرسل على الامه حليم
النبي المصطفى ولابه نبور=يا صلاة الله عليه إتدوم ديم
والشكر لله وفي شكره سرور=ومن يصوم الشهر له اجر عظيم
ومن تهاون فيه ضيعه الغرور=في حياته عاش محرومٍ غشيم
محمد بن عمار
شهر كل ٍ فيه ، بصيامه فخور= ما يذمه ، غير شيطان ٍ رجيم
من تهاون فيه ، ماهو بمعذور= الا ّشخص ٍ فاقد ٍ عقله سقيم
له جزاء المعبود ، أبكار ٍ وحور= في نعيم ٍ حولهن دايم مقيم
الزبرّجد ، في الزمرّد وامغمور= في خيام ٍ وسط جنات النعيم
تحيتي
عبدالله عبد الكريم المنلقب بالطوفان
=المعاصي حوطتنا بالف سور=ونادر اللي بالزمن هذا سليم
والله الراحم وهو ربٍ غفور=يقبل التوبه من العبد الظليم
والسنة شهرين مع عشرة شهور=بينها شهرٍِ مكرم مع عظيم
من بغى العليا ونورٍ فوق نور=جاته الفرصه وهرجي للفهيم