[محمد بن عمار]

السلام عليكم /
الأخوة الملهمين
لي أربعة أشهر والله
ماطرالي الشعر ودخلت
موقعكم أمس وفورا نظمت
قصيدة اليوم ...!
مدري وش السر ، لكن أنتم
ملهمين وبس لاهان غاليكم



هـاتـف الـشوق

كنت أنا له كما الشمعة بوسط الظلام = أحترق لأجل أنوّر له طريق الحياة
تاهت أحلام حبي في ربوع الغرام = وماتت الإ بتسامة بين ذيك الشفاه
عقب ذاك الغلا واللين وعذب الكلام = وعقب ذيك اللباقة جعل عمري فداه
كيف أنا أعيش حب ٍ ما حواه انسجام = ومركبه ما رسابي فوق شط النجاة
مع شبيه ، الغزال بخفته والقوام = دام قلبه نسى من هو ابتلا في هواه
غاب زوله وطيفه ما تركني أنام = وهاتف الشوق يشغلني وأنا في الصلاة
آرتجّي وآتحرّى ، كل عام ٍ و ، عام = و آلصبر ، واصل ٍ بي ، حدّه ومنتهاه
كل ما امر مع حيّه مرور الكرام = هلّ دمعي ، ووقفت كلمتي في اللهاة
دام عهد ٍ مضى ، ما بيننا بالهيام = ضاع من هامش الذكرى وفكره نساه
بعد ما كان ، حب ٍ معتلي ، للغمام = إنكسر به جناح الشوق وتاه بسماه
وسال دمع المناشي معلن ٍ السلام = رافع الغيمة البيضاء ومبدي رضاه
وفي نهاية ،، رواية حبنا، والختام = كل واحد مشا ،، في دربه اللي بغاه

مودتي لشموخكم

محمد بن عمار - 17 / 6 / 1432 هـ