[احمد الجريفاني]

حظيظ من يصبح من العقل مسلوب=ما يجرحه لومٍ ولا يبدي عتاب
ولا تشغله دنيا ولا هجر محبوب=ولا يميّز بين ربعه والاجناب
ما هو سواتي جوفه وجار مشبوب=جمر الغضى وسط المعاليق لهًاب
لا قيل وش بك قلت : تكفير لذنوب=ذنْب الوفا عنه ابيض القلب ما تاب
حياتي اللي روحت كنت منهوب=لو حسبوها ما سوت حفنة تراب
لا واحسافه كان ماعشت محسوب=ولا حصل لي منه يا كود الانشاب
انا على امري دايم الدوم مغلوب=وش عاد ينفعني لو ابديت الاسباب
ماني على سلم الرجاجيل مغصوب=طبعٍ ورثته قبل ينبت لي الناب
درب الردى صوبٍ وانا عنه في صوب=ماني من اللي لا حكى قيل كذاب
ولاني من اللي نظرته داخل جيوب=ولا ني من اللي لا مدح ينطر حساب
المرجله ماهي عباةٍ ولا ثوب=لا من بغيته تلبسه لجل الاعجاب
المرجله قولٍ وفعلٍ وماجوب=من طالها لازم يبرهج له الباب