للي مابعد اعرسوا نبي رايكم بصراحه
 

بسم الله الرحمن الرحيم

للشباب فقط فقط فقط فقط فقط فقط :eek:

اللي يبون يعرسون الحين وماغير تجميع في الفلوس:mad: ابي اسألكم



المهر الحين اذا اعطيتوه الحرمه كم ؟؟؟؟؟;)



وش تتوقع انهم يسوون بهالمهر ؟؟؟؟:confused:




هل تتوقع ان المهر يكفي او لا ؟؟؟؟ >>>>> نطالب هنا بالصراحه :D




وش توقعك لليلة زواجك او كيف بتكون عندكم يالرجال ؟؟؟:(


وش تتوقع اللي بيصير عند النساء ؟؟؟:(



طبعا هنا نقصد حلمك في نفس الليله كيف بيكون شكلها




هل تتوقع ان اهلها بيدبلون المهر لبنته لانه مايكفي او لا ؟؟؟؟:eek: :mad: :(












بالطبع الحديث لا يقتصر فقط على هذا ولكن فيه الشقه والتأثيث والدهره ولكن مطالبين فقط بالرد على الاسئله:confused:

































في النهايه :p الى الان مصمم تعرس والا عندك شك :confused: ;)

بالنسبه للأسئلة هذي ما أعرف إجابتها ألا إن كان أتكلم عنا حنا :

يعني أنا عندي أخت متزوجه وحده والمهر عندنا عادةً أربعين ألف في جماعتنا مدري عن غيرهم وهل بيكفي ماهوب مكفي يدبلونه مايدبلونه هذي والله ليس عندي علم

بالنسبه للزواج أيه مصمم حتى الموت على قولة المحاربين خخخخخخخخخ :)

وش تتخيلها : والله ما أتخيل شيء أنا إنسان واقعي أقول أحب طبع الشيبان وقهوة الضحوية وسوالف تالي النهار وشاهي العصريه

واحب أروح للبر وأحب أجلس في فية النخل ولا أدري غير كذا شيء :)


يعني ببساطه عايش أنا ببساطه

تحياتي ..

مع احترامي 40 الف ماتكفي اذا كان العرس من عند اهل العروس

والله يا شموووخ

أنا قلت هذا في جماعتنا أنا ما أدري عن غيرهم ولا أدري هل هي تكفي أو لا ؟؟

لكن هناك أتوقع شيء مهم وهو أنه ممكن العرس تصل تكلفته لمليون ويمكن تصل لعشرة الآف فالأمر نسبي يرجع لعادات كل عائلة ولعادات كل بلد ...

ولكن أنا من وجهة نظري لو جاء واحد لأختي وسألت عنه ووجدت أنه ممكن أنها تعيش معه مرتاحه وسعيده وهو رجل والله لأزوجه ولو كان المهر ألف ريال لاني لا أرىة الأهميه في المال بقدر ما أراها في الرجال ..

ففيه بنات تتزوج وتبذخ وفي الأخير تاكل تبن مع رجال مايسوى وبعضهن تلقينن العرس بسيط وصغير ولكن المرأة تجد رجل يكفل لها الأمان ويكفل لها السعادة ويكفل لها العيشة المرتاحه ... فالمهر في النهايه هو تعبير رمزي عن التكريم للمرأة وليس تجارة أو مسألة يكفي أو لا ..

تحياتي..

انا ما اقولك لا حتى حنا مهورنا 40 الف وانا اقول لاهلي زيدوها والله حرام على طول تقضي

وكلها في اشياء اساسيه بعدين كيف تقول ان الفلوس ماهي مهمه طيب كيف بتلبس له ولاهل زوجها

وقدام العالم كله >>>>>> بعد فيه اشياء منطقيه

وحنا زواجاتنا في استراحات ومختصرف ويمكن تكلف هذيك اليله بس اكثر من 30 الف بوفيه + صبابه + حلويات

+ موالح + عصيرات + عود من الغالي اللي الكسره مادري بكم وبس .....

ولكن الزواجات الثانيه بعيون شايفه محد قالي يقدمون الفطاير والحلويات الناس بالعاده في صياني

هذولي في اللوحات اللي تعلق على الجدران الزينه اللي اطارها ذهبي ( معروفات عاليات ) وانهم فلبينيتين ويالله

يقوون يشيلونهم عشان اذا خلص الحلاو او الفطاير تتطلع الصوره ,, هذا هو البذخ احسه بس مو معقوله

والله مدري عن عروسكم في الرياض كل شيء غالي خخخخخخخخخ :)

بس بالنسبه عندنا استراحه باربعة الآف فخمة بعد ولا قصر إذا كثر بعشرين الف

وبعدين ظني القصر أو الزواج ماله دخل بالمهر على عاداتنا لأن الزواج يتكفل به الرجال والمهر يكون للمرأة كله يعني مايدخل فيه مصاريف ألا هدومها وخرابيطها في النهايه ما أعتقد بتشتري بأربعين ألف كلها ثياب ولو شرت بتكفيها سنتين وهي تلبس فيهم

ومدري ليه الناس صارت تكلف أشياء ماهي يعني مهمه والبيوت والله مليانه حريم والعالم طفرانه يعني يادوب المهر ويفقون فمومهم ولاهوب معقول كل الشباب أغنياء يعني لابد من حل ..

وأنا أعرف ناس كثير قسم بالله متعقدين يبون يعرسون بس مايقدر على المصاريف ..

وتلقى راتبه ألف وخمسميه يعني يصبر ثم يصبر ثم يصبر ولا عاد يتحمل يخربها ويسافر ولين سافر قلنا له ليه ؟؟

ماكل الناس تقدر تصبر والعرس أصبح ضرورة في الزمن هذا والله ضرورة لأن المشاكل والأمراض والبلاوي كثرت وشبابنا دحدروا وبيدحدر الباقين أن مالحقنا عليهم ..

ولكن أنا أقول أن الخاسر في النهاية البنت وأهل البنت لأن الولد بيتصرف يمين ويسار لو يتزوج هنديه بمتين ريال ويسحب على العالم لكن المشكله البنيات الله يحفظهن ..

وأنا أتلكم وأنا معاشر الشباب وأعرف وش يفكرون فيه ووش مطالبهم ...

الله يستر على الجميع وأن شاء الله نشوف الجميع متزوجين :)

تحياتي ..

فيما يتعلق بالمهر =========> مداخله

اكثر الرجال يبحثون عن الرجال اللي يستاهل

لكن باقي الامور اعتقد انها ميسره واهم شي الانسان انه يجزم يعرس وكل شي يتيسر له وربك كريم

تسلمين شموخ على الطرح


وبنتظار اجوبة الاعضاء

انا توي صغير ما عندي خبره ، لكن اتوقع مع قرار تجنيس غير السعوديين ،
يبن يرخصن الحريم والمهور ، ورايح تنتشر زواجات المسيار ، ويستغنون الشباب
عن هالتكاليف كلها ، كل اسبوع وله حرمه ، ويقعدن البنات في بيوت اهلهن ،
منهن من تقبل مسيار ومنهن من تعجز ولا لقت رجل ..وفي النهاية يمن عليها يماني
او مصري إنه ياخذها لعل وراها قروش

المهر الحين اذا اعطيتوه الحرمه كم ؟؟؟؟؟

على حسب البنت




وش تتوقع انهم يسوون بهالمهر ؟؟؟؟

ما يهمني لأنه راح يكون لهم


هل تتوقع ان المهر يكفي او لا ؟؟؟؟ >>>>> نطالب هنا بالصراحه

المهر بعض الأحيان يكون ذا قيمه معنويه أكثر من قيمته ماديه فـ بعض الناس يكتب في العقد رقم رمزي جداً وبسيط لأن والد العروس هو من يريد الزوج

والبعض الأخر يكتب في العقد ( بأن راتب الزوجه ) من حق والدها ويكون أهم شرط لديه قبل الموافقه على العريس


والذي أعرفه أنا بأن الزوج هو الذي يحدد المهر ( في حال رفض والد العروس تحديد المهر )


وليه ما يكفي المفروض إن الزوجه ما تبالغ في تجهيز نفسها




وش توقعك لليلة زواجك او كيف بتكون عندكم يالرجال ؟؟؟

بصراحه مدري وش أقولك بس أستغفر الله أستغفر الله

يا أنا ضحكت لين دمعت عيوني في قصور الأفراح ( إذا تزوج أحد من الشباب ) أسلم عليه وأقوله تراني أبي البشت حقك لا يضيع

أو أسلم عليه وألخمه وأقول كل عام وأنت بخير

أو أقول ترى البشت منشق من ورى لا تتحرك كثير ( وعلى فكره واحد معد تحرك وجلس يعرق ) يحسبني صادق وأنا من بعيد أضحك

وفيه واحد الله يستر علينا وعليه في يوم عرسه لاعبه فيه أم الركب عاد خلقه أرتجف وأول مره في حياتي أحس إني ثابت وإلي أسلم عليه يرتجف من جد ضحكت عليه ( ومن زين الطبايع صورته بالجوال ) هههههههههههههه



وش تتوقع اللي بيصير عند النساء ؟؟؟

ما أعتقد إني بأفكر فيهم لأني بأكون لاهي بعمري

والله يستر



طبعا هنا نقصد حلمك في نفس الليله كيف بيكون شكلها

إني أوصل للبيت وألقا البشت موب متعرفط ههههههههههههههههههههههههههههههه


هل تتوقع ان اهلها بيدبلون المهر لبنته لانه مايكفي او لا ؟؟؟؟

لا ما أظن وبعدين أنا ودي أعرف وشو له التكّاليف في تجهيز العروس ؟؟

بالنسبه لي أتمنى أخذها بخلاقينها ويكون العرس بسيط جداً ( عائلي ) مو عشان الفلوس لا بس عشان إحنا ( العروسين ) نكون مرتاحين نفسياً وما نشيل هم المعازيم

لكن إذا العروس مصّر على عرس ماعندي مشكله


ردود سريعه :

أخوي إبراهيم السنيدي

[quote]اكثر الرجال يبحثون عن الرجال اللي يستاهل [/quote]

هذاك أول موب ألحين

ذيب سنافي :

[quote]وأنا أعرف ناس كثير قسم بالله متعقدين يبون يعرسون بس مايقدر على المصاريف ..

وتلقى راتبه ألف وخمسميه يعني يصبر ثم يصبر ثم يصبر ولا عاد يتحمل يخربها ويسافر ولين سافر قلنا له ليه ؟؟[/quote]

يا كثرهم والله أنا أشهد وألحين طاحوا في حركة البرنتات لسفريات المتقدم لبنتهم

طيب هذا إلي راتبه ألف وخمس وشوله يتزوج ما يدري إنه غير مسموح له ولازم يكون راتبه على الأقل 15 ألف ؟؟

المفروض ينسجن أو يقص راسه في الصفا قليل الأدب راتبه 1500 ويبي يتزوج ؟؟



المشرف العام :

ومن يقولك إنه ممنوع زواج الأجنبي من سعوديه ؟؟
أوه ويا كثرهم ألحين

لا ومن زين الطبايع فيه قناه نسيت أسمها تزوج العالم ويا كثر المصاريه إلي يبون سعوديات ( يحسبون حريمنا كلهن مدرسات ) هههههههههههههه


بالنسبه لـ شموخ سدير :

طيب وأنا أخوك تخيلي إنك ولد وتبين الستر وتكونين أسره وتبين تعتمدين على نفسك وتدفعين كل شيء في عرسك

ومتوظفه بوظيفه راتبها 4 آلاف ريال

كيف بتقدري تتحملي كل هـ التكاليف إلي أنتي ذكرتيها فوق ؟؟؟

يعني على كلامك راح تاخذي قروض وسلفيات وتحملي نفسك ديون كثيره

وبكذا راح تتعب نفسيتك وراح تلعني اليوم إلي فكرتي فيه بالزواج

عشان كذا في المهر أبو البنت أكيد راح يقدر وضع الزوج ( وصدقيني أغلبهم متفهمين جداً ) لدرجه إن أبو البنت يدفع من فلوسه لو قصر شيء


شيء أخير ترى الزواج ستر لـ الطرفين الرجل والمرأه وليس ذا طابع مادي بحت أو وسيله لـ التفاخر بين الأسر أو الفتيات بأن مهرها أعلى من الأخرى ...... إلخ من التفكير السخيف

الهدف الأساسي من الزواج هو الإستقرار

وأفضله هو تفاهم الزوجين في كل شيء


( مجرد رأي شخصي )

تحياتي وإحترامي للجميع

أخوكم كماند