الليل يا عيال من بدري الملعبة نار ((وسيعين الصدور))

[الطائر المهاجر]

عاشوا .. قاف طيب ... لكن مدري من تدور عليه الدوائر
لذلك سأقف في الحياد..

محمد السفري


جاكم الشعر الهجومي لا يجي من فيه خفه=لا يجيني غير شاعر يضبط القاف ولحونه
فالملاعب لا تجامل اكفخ الشاعر وصفه=كفخة ٍ لا طار منها يحترص من كان دونه

ناصر القزلان


مرحبا بالشاعر اللي مد للغالين كفه = ينتفض بين القوافي يرهب اللي يسمعونه
والله انا ماحسبنا مير طف النور طفه= المعزه بالمعزه والمهونه بالمهونه

محمد


البقا يالشاعر اللي لا تصايدنا نهفه=ثم لا قام يتمعنى زِيد كسرنا سنونه
يا نديم الهرج بالله لا تلفه لا تلفه=الكلام الشين له ناس ٍ ترى بيثمنونه


ناصر

الله اللي مبتلينا بالعقول المستخفه = مير هذا الثور الادرع غرته قوة قرونه
والله ان الريح هبت كل قرطاس تضفه = والبعير اللي تهبد جاه ناس يركبونه


محمد


ثور لا ثارت علومه يرتقي الداني يحفه= مير خلك يالبْقَيِّر صوتكم لا ترفعونه
يا حذاري ثم حذرا من السفاهات المسفه=نسفه المجنون لنه تو باقي في جنونه


ناصر


شف كرا ماروعتني فيه لفات ومطفه = عابرينه عابرينه واطلب من الله معونه
صرت تاجر يامحمد مير وف الكيل وفه = العمى عنده بصيره كان ماشافت عيونه

ــــــــــــــــــــــــــــ

((ابو حرب ))
يامحمد يانديم الرجل السانه يعفه = اتركوا بعض العلوم وطرقها لاتلعبونه
قوم يادكتور وقف ماحصل بالله وكفه= منتدانا مانبى ذولا المجنن يخربونه
ــــــــــــــــــــــــــــــ

ناصر

حيا الله ابو حرب .. ترى الدعوى كلها تسلية يالغالي .. حتى سلاح ابيض مافيه .. هرج يطير مع الهوا .. استلم



والله ان الجن الازرق قام يضرب لك بدفه = ول ياذا الشيخ الاقشر ماعرفنا كيف لونه
يوم شاف العرس جانا مايبي بالعرس زفه = مادرينا عن حديثك دور اللي يفهمونه

ــــــــــــــــــــــــــــــ ــــــــــــــــــــــــــــــ ــــ

محمد

العرب فيهم مهبل بعضهم يالله تدفه=مايصون القاف وده في قوافينا نصونه
الصقر فالجو عالي يعجبك كفخه ورفه=لن بغى الصيده يجيها مايدور للمعونه


ناصر


شفت لي ورع ضعيف جاء يقدم لي ملفه = فالمدارس طاردينه كلهم مايقبلونه
قلت هذا ورع شاطر حطوا الطالب بصفه = يوم طولنا لسانه قام يرمي تيلفونه


محمد

فالقوافي يا نديم أنا كما ((حسان رفه))=وأنت خلك يا صحيبي للمريض تمرضونه
فرق بين المستشار بعلمه أللي ما تخفا=والفلبيني ممرض فالعيادة مايجونه

للمعلومية
حسان رفه
استشاري أمراض قلب


ناصر

جيت ياحسان رفه من طرف خالتك ( عفه ) = عاشت الاسماء وعاش اللي علينا يرسلونه
ليه ياحسان رفه تاكل الشم وتتفه = لعنبو جنس اليماني كيف هذا يامنونه


محمد

جيت يالله مرحبا بك قربوا مشرط ولفه=ومن توسط بالأناثي حصل أللي يكفخونه
جيتني توك تهادى وكاشخ ٍ في ثوب دفه=لابس الدفه ندفه ونلحقه ربع ٍ يبونه

عاشوا .. قاف طيب ... لكن مدري من تدور عليه الدوائر
لذلك سأقف في الحياد..


هههههههههه

حياك الله يبو عبد الله

والله إن ناصر كل علومه غانمة بس الملعبة هذي حلاوتها