بعض العرب يبني

[الطائر المهاجر]

بعض العرب يبني على غير تأسيس = ينسى القواعد ما وضعها بْحسابه
وان بان شقّ سدّه ببعض تلييس = ويا ويل من يهرج بذيك الخرابه
ما يقبـل إلا كل مـدح وتحليس = واذا تقـول الحـق يفقد صوابه
عايش بـوهم يحسبه امرئ القيس = شعره اثر يروي العشق والصبابه
الكل في رايه خصـوم ومنـاجيس = حتى ولـو حـاولت معه بحبابه
حسّاس عايش في صراع وهواجيس = يقـرا غلـط ما تشرحه بالكتابه
همّـه تنفّـذ ما يبـي بكل تحـليس = تمـدح فقط والا تحمّـل سبابه
ما يـدري ان الشعر عزّ ونواميس = باخلاق تاصل فوق هام السحابه
فالشعر يعطينـا مشـاعر واحاسيس = نفهم بها الإنسان نعكس عـذابه
والرجـل في حرفه بعيد المراميس = يـازن كلامه ما ينفّـر صحابه
ومن ظن نفسه كاملٍ طـاوع ابليس = يعميه عن شـوف الحقيقة سرابه
من ياصل القمّـه على غير تأسيس = يا سرع ما يهوي ولا حدٍ درى به