اولاد إبليس

[محمد اسماعيل الرفاعي]

يــا مدسوس الزمن العاتم خلف رُكام السحب القاتم
عارف برقك خُلّب وعاوز تشلع مطر الحِن كيفن ؟
يا منزوع القلب النابض وخايف من الأسد الرابض
وشارب علناً كاس من فودكا وكاس من جن
يا ممسوس الجنّ الأكبر سادر في الفارغات تتمظهر
جناً طالع منّك حيّر حتى شيوخ الجن
يا مخدوع الكرسي الأشتر جيت بي سيفك عامل عنتر
تحتك لهب الجور إتحكّر
لهلب جوراً خلى الحجر الساكن
في واطتنا يئن
يا مغشوش بالراي الأبتر كل تاريخ الخزي مسطر
وكيف خليت الزول الهادي ورايق
وواعي وراسي
ينتِّف شعرو يجِن
أنا بسأل فيك وانا وعارف
إنو الحيطة محال في يوم تتكلّم
وعارف إنو الجبل الراسي
عديم إحساس
ومحال في يوم يشعر يتألم
وعارف إنّو الفوضى السكنت في جواك
محال في يوم تهدأ وتتنظّم
شان إنتا خلاص ..
إحساس الزهو زمان غشاك
أصبحت عنيد
ماك شايف زول في الدنيا سواك
خالف رجليك
قاعد متحكِّر في ملهاك
خاواك شيطان مبهور بالعيشةحِداك ومعاك
بقى طول اليوم عايش جواك
زي ضُلّلك يوت بتمشّى حِداك
متحكِّم فيك ماليك للساس والراس
في القالوا كبير .. أو حتى وزير
لا خلى غفير لا شيخ حُرّاس
ورونا زمان .. إنو الإنسان قبل العشرين
بي زي سنتين
حسب القانون
بتعدّا خلاص من الراشدين
لكين بي وين ؟
مادام إبليس
خلّف جنيات
بينات الناس في الكون عايشين
واولاد الناس ..
هم التايهين في بحر الهمّ الليهو سنين
المارق منو بيلعن في الداخلين
والداخل بلعن في المارقين
من وحل الطين
وبيناتن ناس دايماً ظاهرين
في كل تشكيل
سبحان الله ..
زي الفاهمين
وهم ما عارفين غير التامين
وانا لسع بسأل في نفسي
يا ربي دحين ..
فاقد الإحساس
مخلوق من نار زي عيلة إبليس
أو زي الناس مخلوق من طين ؟
الجمعة 6 /8 /2010م]