عبدالله مذكر العقيلي... والطائر المهاجر

[عبدالله مذكر العقيلي]

الطاير/ يقولون المطيري في الغزو ما يذبح الرجال=مغير انه على بعض القصايد شادد حيله
عبدالله/ ترى فعل المطير يابيض الشارب مافيه اجدال=ليامنه رفع سيفه مافيه انسان يبديله
الطاير/ هذاك اول زمانٍ كان فيه الرجل بالأفعال= واما اليوم هرجه قادمٍ لو ضاعفٍ حيله
عبدالله/ صحيح اللي تقوله بس انا من منبع الابطال = ولولا حكم ابن سعود اهجد الخصم في ليله
الطاير/ مدام انك مهجد فارع للنعمه بليا جدال=وبار الساس مثل الغير في مشيه وتختيله
عبدالله/ تغير كل شي الله يعين ويرحم الاحوال = وهالحينه يبيلك هرجةٍ زينه وتطبيله
الطاير/ اذا ما ودك تطبل فدور لك على طبال= او انك تعتكف مثل المهاجر في منازيله
عبدالله/ زمان رويبضه هذا ترى مذكور يارجال = وانا ونته رجال مانحب الغدر والميله
الطاير/ لأنك فاشل عاجز فلا من جاه وإلاّ مال= تدور عذر لو تضبط سياقه قبل تحليله
عبدالله/ الا ياشهر شعبان المسمى منته بشوال = وبنك سويسرا محدٍ عرف وشلون تمويله
الطاير/ اجل انت الممول وانت ما عندك ثمن سروال= ولا تدري يجوز الصوم بليلٍ غاب قنديله
عبدالله/ اكيد انت الخبير اللي يعرف يفصل التفصال = تعال اخذ المقاس اللي يناسبلي بتفصيله
الطاير/ ترى من يبغي التفصيل بليا فلوس يالبنقال= محد يعطيه وجه ولو طلع ذيله
عبدالله/ الا ياشجرة الزيتون وش في غصنك الميال = ليا منا بغينا نقطف الزيتون ملتيله
الطاير/ ترى الزيتون ما يصلح شعار صار كالغربال= وكلن قام ينخي به ولو زود بتدجيله
عبدالله/ ليا طال الجدال وطالت الدعوى كلامك طال = لكن اختم بهذا البيت ولحدٍ جاتله ميله