ترى الذبايح و أهلها ما تسليني‏

[نفحات حساسة]

آخر ماقالته الشاعره الكبيره المرحومه بإذن الله عابرة سبيل
قبل وفاتها بساعات ووجهتها لزوجها
عندما خرجت من المستشفى عمل زوجها ضيفة لها بفرحتة بعودة
زوجتة الغالية لكن الاقدار تحكم على الانسان
والأبيات توضح ذلك وتبين ثبات المؤمن وقبوله بقضاء الله وقدره
وللدعوه للشاعره بالرحمه
ولأن في أبياتها عبرة كبيرة للمؤمن
وأن كل إنسان سائر على هذا الطريق
وأن الكل راحل لامحاله إن طال عمره أو قصر
:::



ترى الذبايح و أهلها ما تسليني
أنا أدري إن المرض لا يمكن علاجه

ـــــــــــــــــــ

أدري تبي راحتي لايا بعد عيني
حرام ما قصرت يديك في حاجه

ــــــــــــــــــــــــ

أخذ وصاتي وأمانه لا تبكيني
لو كان لك خاطرٍ ما ودي إزعاجه

ــــــــــــــــــــــــــ

أبيك في يديك تشهدني وتسقيني
أمانتك لا يجي جسمي بثلاجه

ــــــــــــــــــــــــــــ

لف الكفن في يديك وضف رجليني
ما غيرك أحدٍ كشف حسناه واحراجه

ــــــــــــــــــــــــــــــ ــ

أبيك بالخير تذكرني وتطريني
يجيرني خالقي من نار وهاجه

ــــــــــــــــــــــــــ

سامح على اللي جرى ما بينك وبيني
أيام نمشي عدل وأيام منعاجه

ـــــــــــــــــــــــــــــ

همي عيالي وأنا اللي فيْ كافيني
علمهم الدين تفسيره ومنهاجه


رحم الله الشاعره عابرة سبيل وموتى المسلمين اجمعين
/
/
/

وبعد وفاتها رد عليها زوجها بهذي القصيدة الرائعة والمؤثرة

حاولت أنام وحاربت عيني النوم **وجاريت صوت مثل صوت الذيابـــه

الجفن كنه بوسطه هـــــــــزوم ** ودموع عيني مثل رش السحابـــــــــه

على وليف ( ن) قالوا اليوم مرحوم ** راح وتوفى ما تهنا بشبابــــــــه

زرت القبور اللي على بعضها رسوم ** و حطيت رسم فوق ذيك النصابـــه

قلبي من الدنيا عليل ومسموم ** والرسم توه عقب حطت كتابــــــــــــــه

أحبها مير القدر صار مقسوم **و تحبها كل الأهل والقرابـــــــــــه

الموت أخذ شجعان وقروم ورخوم **وأخذ رسول الله وكل الصحابـــــــه

الله يرحم اموات المسلمين اجمعين