الصيفي بن جريس وينه.......................... ..

[راعي الخطامه]

القصيدة التالية كتبها الشاعر حمد المغامس، عندما زار الشاعر الصيفي بن محمد بن جريس، فوجد الباب (مصكوك) على غير العادة.. حيث كان أبو محمد يرقد في المستشفى العسكري بعد إجراء عملية بسيطة تكللت بالنجاح وقد غادر المستشفى مطلع هذا الأسبوع بعد أن اطمأن الأطباء على صحته بعد العملية:

يا أهل القصر وش علمه الباب مردود=الصيفي بن جريس بالله وينه
هاتو خبر يالربع صبري له حدود=قلبي يتراجف مثل رجف المكينه
إن كان هو بالبر عازب مع الذود=نبي نروح اليوم ذا قاصدينه
قالو رفيقك به قريب وموجود=بالعسكري جناح له حاجزينه
وأبشر تراه بخير وصحته في زود=وعنده دكاتر بالدوا متابعينه
الكل ما قصر بذل كل مجهود=الشيخ من جاهم وهم عارفينه
وجهت له من دون غاية ومقصود=وسألت عن دور به امنومينه
شفته بخير ويبتسم حوله ورود=وعقب الزمل حسيت أنا بالسكينة
أبو محمد ماكر الطيب والجود=ضاق الجناح من الربع زايرينه
راع الصخا والجود لا شك محسود=واللي تعلا فوق ذا حاسدينه
شاعر كريم ورث شعره من العود=ينظم من القيفان صافي رزينه
الدوسري ذا نبخصه زين يا سعود=شيخ ولد شيخ وذربه يمينه
المدح بالأشعار ما منه منقود=والوردي وغيره ترى مجربينه
تمت بذكر اللي خلقنا ومعبود=رب كريم وكلنا عابدينه