إمطري ياسحابة

[منيع]

مرثيه قالهااخي سالم بن حمد رحمه الله في احدشباب البلد(فخري الزكري) وهي بلسان حال والدته رحم الله الجميع


إمطري ياسحابة فوق قبره وهلّي = روّي تراب قبره ماإرتوى من شبابه
مغرب السّبت فارق والخلايق تصلّي = يا مسا السّبت لاترجع تجدد مصابه
وياصباح الأحد وشلون بنساك قل لي = يوم حطّوه في قبره وهالوا ترابه
[ فخري ] اللّي بعد فرقاه مالي مسلّي = صرت عقبه مع الأحزان حلف وصحابه
ساهرة طول ليلي بسّ أهوجس محلّي = كيف أباقضي حياتي ؟ مااتحمّل غيابه
ضاعت سنين عمري ضاع حصني وظلّي = جرّعتني الّليالي كاس مرٍ شرابه
راح زرعٍ زرعته في سنينٍ مضن لي = راح منّي وانا حطيّت كل الرّجا به
يااللّه إنّك تصبّرني على ما حصل لي = ياكريمٍ جميع الخلق ترجي ثوابه
واغفر لْوافدٍ وافاك صايم مصلّي = واحشره يوم بعثه في يمينه كتابه