ابو شيبه وبن منشار السبت10/3/1430هــــ

[نجم الإبداع]

عايض=
الا يأهل الشعر نادو لأبن منشار=نبي ناخذ علومه من مصادرها
نبي نسمع جديده واخر ألأخبار=تراه امن الرجال اللي نقدرها
فلاح=
هلا يامرحبا ياعايض المغوار=علومي بايته والطير خابرها
اشوف الناس في هم وغلى اسعار=عجزنا يارفيقي لانجيرها
عايض=
اظن ان البلا من طمعة التجار=حقوقك يالمواطن من يقدرها
بعد نكسات الأسهم زادو المعيار=وهاذي قصتن محدن يفسرها
فلاح=
يقولون البلد في حالة استنفار=وكلن طمعته يبغى يبررها
عجزنا نعرف اللين من الجبار=ملامس ناعمه والحقد يغمرها
عايض=
يقولون البلا مربوط بالدولار=وبعض الناس مارحمو مشاعرها
ولا كن ربك اللي يعلم الأسرار=لعل الله من افضاله يدمرها
فلاح=
من اهل العولمه تتضارب الافكار=وكلن حجته لابد يضهرها
مصيبه عمت اهل الطيب والفجار=ولاحدن سالمن من كيد غادرها
عايض=
كلامك صدق والله ماعليه اغبار=نشوف ان البشر باعت ضمايرها
وحنا في زمن من عاش به يحتار=مدام ان البشر عميت بصايرها
فلاح=
اعرف ان العرب مايتركون الثار = واشوف اليوم فكرتنا نغيرها
بلاد المسلمين اليوم باستهتار= حدن يحتلها واحدن يناضرها
عايض=
لهيب اسعارنا يشبه لهيب النار=و بعض ارزاقنا صرنا نصدرها
الا ياجز قلبي جزت المنشار=من اسباب الديون اللي نعمرها
فلاح=
ترى ياصاحبي مامثل الاستغفار=ودنيانا كفانا الله مخاطرها
حقيقه من غوى العالم انا محتار=وعيني ملت العبره محاجرها