يافـــــــــــلانه

[عوض سحمان العتيبي]

يابنت درب الهواء قررت نسيانه= من يوم جيلك على الكيبورد زاحمنا
بعز نفسي وقدري رافع(ن) شانه =وانطق صحيح العباره ماتفاهمنا
لونظره الود بالاعجاب مليانه = خابت ولا عاد بية حال تلزمنا
مالك بعيني صحيح اياتها خانه = انتي ومن يشبهك عن صنفكم شمنا
صنفاً عيونه لحب الغير ولهانه = لافاد نفسه ولا قاض(ن) لوازمنا
مانرتجي للبخيل ومدت ايمانه =حنا على قسمنا ماحد(ن) يقاسمنا
لوشح فينا الزمان وبان حرمانه=مانشكي الظلم لو الوقت ظالمنا
فطرة شرف والعدل مامال ميزانه=لو مال فينا الزمن ماارخى محازمنا
ياللي بعيني كما لولوء ومرجانه=كنتي مثال الشرف ساعة تعشمنا
واليوم طحتي من الثنتين يافلانه= عشنا التجارب معك والوقت علمنا
لايمكن إنا نصدق بنت خوانه = لو كان قدم العرب بالستر توهمنا
الحب فاخر زمن مكشوف برهانه=والناس هيمانته يارب تعصمنا
حباً على المصلحه تشييد سيسانه=ينهد واخر مطاف انه يحطمنا
مانقبله لو عليه الناس شفقانه = حتيش لو اب مشاعرنا تيتمنا
من يقبل الظيم وقته بالقسى هانه=يتجرع الغبن منهو كان لايمنا