فهد بورسلي

[الطائر المهاجر]

بطلوا خلو نستريح



بطلوا خل نستريح = هذا هو الرأي الصحيح
ود ميتر جيب واير = ذا فقير وذاك تاجر
بس قضضتوا العواير = والعرب كل يصيح

مدرانا وين كانوا = إرحلوا والا تغانوا
جان وقت الضيج بانوا= يوم جا الوقت الشحيح

الأمر أمر خطير = بلاد ما فيها مدير
جبتوا من بصمه خبير = عضدوا له لا يطيح

بصمجي ما أدري بصمجي = حلوجي ما أدري تتنجي
وأنا أظنه عربنجي = وعندنا المنصب مريح

منهو فعله منهو أمره = لمبه بيضا تصير حمره
بكل شبه نشوف جمره = يستر الله ما تطيح

النظر ردوا الاوايل = سراينا يا بو فتايل
كهرباء وتفنن حمايل = ميتر " الأي سي " وكيح

سراينا يا بو فتيله = ما يشكل كل ليله
بالعجل شبه وشيله = من الأذية نستريح

لو يشب تريك دارك = ما يشب تريك جارك
أذت اطوالك قصارك = ما بكم واحد صريح

ما نبي بنكه ومدفي = بس نشوف الدرب يكفي
بالمكينة الجرح مخفي = ما تداوون الجريح
دبروها يا شراكه = ونبهونا ما نتشاكه
من الجدر تكفي الحكاكه = والعبوا لعب مليح

غربلتنا ها المكينة = نوب ضعيفه ونوب سمينه
كل ها الدقة اللعينة = من عدو عيسى المسيح

كهربا العالم مدمرها = لي شروا وحده كسرها
لحيته يفرق شعرها = منظره منظر قبيح

الأجانب قام حظهم = واستفدنا من مرضهم
شطر وبسكات عضهم = زلغونا بلا نبيح

بطلوا خل نستريح = هذا هو الرأي الصحيح