خاب الأمل..وسلاحنا برقر وكودي

[الطائر المهاجر]

خـاب الامل والفكـر لا زال محتاس = من بعد ما بان الجفا والصدودي
كنت احسب إنّ الحبّ للحبّ حسّـاس= واثري أعيش بوهم ماله حدودي
ومن حـرّ مابي سرت بالحزن والياس = طفـلٍ يتيمٍ تاه وسط النفـودي
صدفه وانا اضرب هاجسي فوق الارماس = طاح النظر في عين ظبي شرودي
حـوريّة لا هـي من الجـنّ والنـاس= ترسل عذابي مع ورود الخدودي
قـلت التحيّة .. ردّت بعقـد الالمـاس= وطيّر بقـايا العقـل هرج العنودي
قـالت من انت وقلت انا عـالي الساس = دمّي بحرف الضاد ينبض وجودي
قـالت تفيخر وانت من خسّ الاجنـاس = لانتاب لا امريكي ولا انته يهودي
روس العرب يا للأسف صابهـا انعاس= تهوى التبطّح دايماً والرقودي
لا شكّ راسك مثلهـا قـالب الطـاس = لا من صحيت اقبل وهات الشهودي
قـلت الغلـط خـلّيه محْتـاج هوجاس= حنّـا نتبطح لا نوينـا الأسودي
الحرب خـدعه وكل حرب لهـا الباس = ولباسنا بالحرب برقر وكودي
قـالت تنكّت .. قـلت من لاهب الواس = لا من سمعت اخبارها والركودي
هـذا حصان صـاده اليـوم نسنـاس = وهذا رمى سيفه وخان العهودي
وهذا يطـارد ذا .. وذا صـار بـلاّس = والكل دايـخ للحـريقه وقـودي
من وهجهـا بـوشٍ نتف كل قـرناس = واوراقنـا المتلخبطه في صعودي
اللـي براسه عقـل مخطـر بوسواس = والرابح اللي ما درى بالوجودي
يـالله تعـدّلهـا علـى كـل مقيـاس = والا تميّلهـا ببرق ورعـودي