الخلاوي

[الطائر المهاجر]

يقول الخلاوي الذي ما يكوده =جديد البنا من غاليات القصايد

قصايدٍ لا بد الملا تستفيدها =لا مسى غريم الروح للروح صايد

لعل الذي يرونها يذكروني =بترحيمةٍ تودع عظامي جدايد

أوصيك يا ولدي وصاةٍ تضمّها =إلى عاد مالي من مدى العمر زايد

وصاة عودٍ ثالثة رجله العصا =وقصْرتْ اخطاه اللي من اول بعايد

وصاة عوْدٍ زل حلو شبابه =وعانيه بالدنيا وعانيك واحد

يبديك بالغالي على شف نفسه =شفيقٍ من أيام الرضا عنك ناشد

لا تاخذ الهزلى على شان مالها =ولا تقتبس من نارها بالوقايد

لا تاخذ الا بنت قوم حميده =عسى ولد منها يجيب الحمايد

يجزي عمل راعي الحساني بمثلها =ويجزي عمل راع النكد بالنكايد

ولا تتقي في شجرةٍ ما بها ذرى =ولا تنزل الا عند راع الوكايد

ولا تسفهْ المنيوب لا جاك عاني =إياك يا ابني ومطل الوعايد

أبيك تسوّي بي سواتي بوالدي =وانته على غيره بمثلي وزايد

لي من قديم العمر نفس عزيزه =أعض على عصيانها بالنواجد

قد أو زمتها ماكان خوفٍ إلى بقا =عليّ من أيام الردى أن تعاود

يا طول ما وسْدت راسي نكاده =من خوفتي يعتاد لين الوسايد

من عوّد العين الرقاد تعوّدتْ =ومن عود العين المساري تعاود

ومن عوّد القوم المناعير مطمع =تلوه بالانضا والجياد العدايد

ومن عود الصبيان أكلٍ ببيته =عادوه في عسر الليال الشدايد

ومن عود الصبيان ضربٍ بالقنا =نخوه يوم الكون : يا با العوايد

ومن كثّر الطلعات للصّيْد ربما =يوافيه غراتٍ تجي منه صايد

ومن تابع المشراق والكن والذرا =يموت ما حاشت يديه الفوايد

الايام ما باقٍ بها كثر ما مضى =والاعمار ماللي فات منها بعايد

نعد الليالي والليالي تعدنا =الاعمار تفنى والليالي بزايد

إلى دقّت الوسطى البهام تذكرت =زمانٍ مضى ماهو لمثلي بعايد

فلا بد ما سحم الضواري تحوفني =بليلٍ ولا لي عن لقاهن بزايد

يمشعن هبرٍ من الظهر كنه =خبايب أفعى بين حدب الجرايد

قلت : يا عواد يا هاشل الخلا =إلى جو يدزون المطايا البلايد

يا عيد يا عواد إن أشْملَلت بكم =كبار الهوادي ناحلات المقاود

كفرق القطا صفر الحلاقيم ساقها =سمومٍ من الجوزا كحامي الوقايد

وجزت الدياميم التي مدلهمه =وطيّرت بالظلما قطاه اللوابد

على عيدهي أو على عيدهيه =حداكم مابين النجيرين قاعد

بتيهٍ يسل القيض فيها سيوفه =على الحي إلا الجازيات الرواغد

بها تقسم الانطاف يومٍ على الصفا =إذا يبست الصملان إلا زهايد

يزيد نجيب الخال فيها جلاده =وتزداد فيها اللا يمات الجلايد

إلى ما لفيتوا بالمطايا تقيّدوا =لدى من تقي راياتها بالحدايد

فعج لي لا عاقك الله بالنيا =فحبل المنايا للبرايا قلايد

تفكر يا ميمون في ربع دمنه =خلا ربعها من اهلها يا بن زايد

دار لكن الحي ما وقفوا بها =ولا شببوا فيها لهيب الوقايد

شمالي من اعطاف النقا من تقيّد =سقاها الحيا سيل الرعود الشواهد

وقل : يا ليالنا القدام التي مضت =بالاقبال هل لي في لقاكم عايد ؟

قل : الله هل شفت السخي ابن سالم =منيع من حاش الثنا والفوايد ؟

تطاوحنه الايام لين اودعنه =يشيد على ثلب قصيف البدايد

يشد على ثلب وهو كان فبل ذا =على ظهر الجدعا يدور الفوايد

وهو كان فيما قد مضى من زمانه =جميل الثنا من حامدات وحامد

وهو عقيدالركب لولاه ما غزوا =ولا نسّفوا باكوارهن الجواعد

ودليل عوص الناجيات إلى اختفت =معالمها والنابيات الفرايد

وإلى بغى يمضي على العزم وانتوى =أخذ راي ألفٍ وانتقى منه واحد

يا طول ما يارد بهم جاهليه =يفجا الشبا عن كوكب ماه بارد

قل: يا منيع كاسب الحمد والثنا =إلى ما القنا ألوت عليه المطارد

يابن الندى يا جالي الهم إن طووا =على عد من بعض الجلاعيد صايد

بزرقا لاهلها ما طها ها وسادها =مع الحكم نقضي من بنانٍ وساعد

فمن مفجيات اليد في لمة الصبا =إلى ما لفا من رمعة السّوْ زايد

قل: الله لي من دمعةٍ يا ابن سالم =لها حادرٍ قلبي هموم وصاعد

لفاني بها - لا ساعد الله ركبه =إلى ساعد الركبان مع من يساعد

على شان سلطاني عقيلٍ كميتها =زمان القسا يشفي قراه الولايد

سريع القرى للضيف في ليلة الشتا =وعيد المقاوي سيد الناس ماجد

قوي وساع السمط في كل مسغبه =تعادا بها نسل القيان الولايد

ذوي من يلبي الضيف من مدلهمه =من الليل والما في مفابيه جامد

يقوم بها عن مضجع الليل منتوي =ذبحه سمان من لقاح الجلايد

يهليّ بضيفه بالنيا حين ما لفى =عن العذر من دون اللوايا الزهايد

من خاطر الظلما والايدي لكنها =عصابٍ من آثار السيوف الجدايد

فمن عاش بالدنيا يرى يابن سالم =كريه الليالي والامور الشدايد

ومن ساعدته الايام ادمجن حبله =وينقضن في حبل الذي ما تساعد

كفى الله ذاك الوجه نار من اللظا =بحق المصلىَّ له بجل المساجد

يا ما غدى من حرةٍ عامريّه =سماويةٍ نمرا الذراعين صايد

إذا ضربت ما تضرب إلا متونها =بيوم على منصاه للصيد جالد

وليس يعطى بالأيادين صيدها =ولو عضنا دهرٍ بناب وناجد

فجا ميمرٍ يا طال ما صبّح العدى =على الهجن والخيل الجياد العدايد

يعنّها للضد ثمٍ يردها =بالارسان كرهٍ والنضا كالجرايد

بشرٍ وببلاشرْ من صبّح العدى =حفايا ومنها ناقضات البلايد

يتْلن كالقناص يوم جرى له =هموم ويوم راح فرح وصايد

لكنه على ميرادها حين يعتدي =على الضد من بين الفجوج البعايد

قطامي فتى يا طال ما ناش نوشه =بلْج الهوافي مرهفات الحدايد

ترى الثنا يابن كليب على الفتى =مكادٍ كما بالعين شوك الكتايد

فلا وخليلي الذي يعطي الغنى =وخلف العطا منه الرجا بالوعايد

إن كان قد ماتوا فيا طول ما ملوا =مزاود ضيوفٍ من قراة القواصد

وإن كانها مالت فيا طول ما ملوا =بطون اليتاما في السنين الشدايد

مهو بصبي كرمته حد جزعه =تعادى بها سمح الوجيه الولايد

ينوِّر عمود الصبح ما شيل فضلها =ذا صادرٍ منها وهذاك وارد

بجوزيةٍ ما يبرح الضيف فوقها =كما الثاقب المنقاد بين البدايد

قولوا لبيت الفقر لا يامن الغنى =وبيت الغنا لايامن الفقر عايد

ولا يامن المضهود قوم تعزه =ولا يامن الجمع العزيز الضهايد

وادٍ جرى لا بد يجري من الحيا =إن ما جرى عامٍ جرى عام عايد

ومنها .....


متى الثريا مع سنا الصبح وايقت =على كل خضرا ودعت بالسنايد

من عقبها نجمٍ كما فرخ متلي =على الشوف يتليها بمشيه يعاود

وبوارح الجوزا ربت فيه بسرها =وتخالف الالوان بين الجرايد

والى ظهر المرزم شبع كل كالف =من الغيد وانحن الليال الشدايد

ونجوم الكليبين اللي تنشف الجم =يغور فيها ما العدود الوكايد

والى مضى ثمانٍ مع أربع =الخامسه طالع سهيـــــلٍ يحايد

تشوفه كقلب الذيب يلعج بنوره =مويق على غرات حدب الجرايد

والى غابت النسرين بالفجر علّقوا =مخارفٍ في لينات الجرايد

والى مضى واحد وخمسن ليله =لا تامن الما من حقوق الرعايد

قضى القيض عن جرد السبايا ولا بقى =من القيض إلا مرخيات القلايد

ومن لا يسقِّي كنّة القيض زرعه =فهو مفلس منها نهار الحصايد

وصلُّوا على خير البرايا محمد= ماناح ورقٍ فوق حدب الجرايد